Fischsupp

Beitrag: Jürgen Sakuth

Elke Grotelüschen hett maleenst ’n nieget Rezept op’e Rücksiet vun’n
Klennerblatt funnen un wull dat glieks mal utprobeern: Fischsupp mit
Look.
Se güng an’n Friedag na’n Fischhöker op’n Wekenmarkt vun Niestadt
in Holsteen un seggt:
„Ik harr geern ’n lütt Stück Dösch!“
De Fischhöker wiest ehr mit sien Mess de Steed, wo he achtern vun
den groten Dösch wat afsnieden wull un fraagt:
„So veel?“
„Jo“, seggt se, „dat is akkerat so veel as ik bruuk. Maakt Se mi man ok
glieks noch de Graden rut!“

„De Steert vun’n Fisch hett aver keen Graden!“ belehr de Höker ehr.
„Wat? Is dat redig so?“ fraagt Elke heel verbaast.
„Tja, beste Fru, dor hebbt Se wull vundaag noch wat vun mi lehrt“,
meent dor de Fischhöker ’n beten överdorig.
„Jo, dat heff ik“, meent se dor mit’n völlig unschüllig Gesicht,
„un dat kunn een sik jo egens ganz licht marken.
Dat is jo akkerat so as bi de Mannslüüd!“

Quelle: Heinrich Evers „Dat dröfft doch mal seggt warrn!“
(Balticum Verlagsgesellschaft und Werbeagentur GmbH)
Illustration: Elke Grotelüschen