Johresutfohrt

Beitrag: Jürgen Sakuth

De Landfruenslüüd vun’n Knuust (so heet jo dat Eiland Fehmarn bi de Plattdüütschen in Oostholsteen) hebbt mal vör vele sohren en Utfohrt na Hamborg maakt. Toeerst güng’t na „Planten un Blomen“ un dorna na Stellingen in „Hagenbecks Deertenpark“
„De twee Saken mööt ji unbedingt kennenlehr’n!“ harr Meta Steenbuck, de Vörsittersche, swöögt. „Dat is doch wat anners, as jümmers blots Kohlköpp un swattbunte Köh op ’n Knuust ankieken!“
Gerda Mackeprang harr blots noch schimpt as ’n Rohrspatz na de vele Loperie bi Planten un Blomen un Hagenbeck:
„Dat harrn wi uns doch ok op ’n Film bi‘ t neegst Landfruens-Drapen ankieken kunn. Ik weet nich een noch ut mit mien Fööt!“
Dor meen ehr Fründin mit ’n Smuustern:
„Du hest man blots dat verkehrte Schohtüüch an, Gerda. Pariser Schoh un fehmarnsche Fööt, dat passt nu mal nich tosamen!“
Man, as dat in’n Alsterpavillon dat grote koolt-warme Bufett to Liev güng, weer de Pien vun’n Nameddag bannig flink vergeten, un all töven vull Vörfreid op dat licht frivoolsche Avendprogramm:
„Hamborg bi Nacht mit Olivia Jones“

Un se harrn sik nich to veel versproken. De Avend mit Olivia Jones op St. Pauli, dor snackt se vundaag noch op’n Knuust vun. Sünnerlich över de Fraag vun Alwine Möllemann, de fiefunachtigährige Ehrenvörsittersche, an Oliva Jones:
„Seggt se mal, Fru Jones, woso loopt denn hier op’n Kiez soveel junge Fruenslüüd mit korte Röck, depe Utsnitts un hoochhackt Schoh rüm? Wenn de sik man blots nich verköhlt!“
Olivia Jones verkloor:
„Das sind Prostituierte, Frau Möllemann. Die verdienen sich hier auf St. Pauli ihren Lebensunterhalt!“

Spar Alwine harr denn meent: „Na, wenn dor man nich ok ’n poor Nutten mank sünd!“
Man düsse Anter vun Alwine Möllemann is dat, wo se vundaag noch jümmers op’n Knuust över smuustert.
Ik verstah dat.

Quelle: Heinrich Evers „Dat dröfft doch mal seggt warrn!“
(Balticum Verlagsgesellschaft und Werbeagentur GmbH)
Illustration: Elke Grotelüschen